Die elektrisiteitkrisis waarin Suid-Afrika hom tans bevind, word vererger deur die wêreldwye prysstygings van kunsmis en energie, sê die CRA in sy weeklikse risikoverslag.
Die feit dat dit tydens fase 6-beurtkrag baie moeilik is om veral bederfbare produkte te hanteer en vars te hou totdat dit verbruik word, gaan tot grootskaalse vermorsing bydra en die CRA waarsku dat voedselinflasie drasties kan verhoog.
Die sentrum waarsku ook dat die maatskaplik-ekonomiese impak van die voortslepende beurtkrag op vlak 6 tot onstabiliteit en onlus kan lei, veral in die wintermaande wanneer duur voedsel en gebrekkige kraglewereing verbruikers die swaarste kan tref.
Die moontlikheid van arbeidsonlus kan ook nie uitgeskakel word nie want, verduidelik die CRA, werknemers gaan probeer om werkgewers onder druk te plaas vir beter lone en salarisse om voedselinflasie en stygende lewenskoste te oorleef.
Dit sal in die algemene verkiesing in 2024 die steun vir die ANC laat daal, sê die CRA.
Gevaarligte
Intussen sê prof. Andre Jooste van die departement landbou-ekonomie aan die Universiteit Stellenbosch die druk waaronder boerderye geplaas word om voortdurend meer geld te bestee net om hul dagtaak te verrig, beteken dat hul al minder kan belê in hul boerderye en uiteindelik die ekonomie.
“Met al die verhoogde insetkoste gaan dit sommige boere voor die besluit te staan bring om óf minder mense in diens te hê óf die bedryf te verlaat.”
Jooste sê die feit dat kospryse tans weekliks styg (weens 'n verskeidenheid van faktore), terwyl Suid-Afrika baie hoë vlakke van armoede en werkloosheid het en die staat se dienslewering ál meer verswak, laat gevaarligte flikker dat die onluste van 2021 hulself kan herhaal.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
