Só sê mnr. Thomas Conradie, waarnemende hoof van opwekking by Eskom. Hy het gistermiddag op ’n mediakonferensie gesê die nutsmaatskappy gee dringende aandag aan sy skedules vir beplande instandhoudingswerk.
Eskom se hoop om beurtkrag oor die naweek te verlaag, hang af van twee opwekkingseenhede wat vandag weer aan die werk moet wees om krag aan die netwerk te lewer.
Hy het ook genoem deel van Eskom se prioriteite is om seker te maak die beplande instandhouding raak nie agter nie en skedules bly op dreef. Conradie het ook gesê die huidige instandhouding moet op dreef bly met die oog op die komende wintermaande.
‘Volgens plan’
Hy het gesê die huidige herstelwerk aan Koeberg se eenheid
een loop volgens plan. “Ons gee noukeurige aandag hieraan en dit bly ’n
prioriteit.” Die herstelwerk aan van Kusile se eenhede wat nie deel was van
beplande instandhouding nie, kry ook dringend prioriteit.
“Ons moet aanhou om die noodreserwes, soos die oopsiklus-gasturbines, te beskerm en daarom bestuur ons dieselvlakke baie versigtig. Ons moes die turbines juis vroeër vandeesweek baie hard inspan en dit het bygedra tot die verhoogde vlakke van beurtkrag die week.”
Eskom het bevestig sy herstelplan wat twee weke gelede bekend gemaak het, sal oor twee jaar strek.
Conradie het ook bevestig Eskom se geld vir diesel kan nie opraak nie. “Die direksie en bestuur is heeltyd besig om planne te maak om genoeg geld vir diesel te hê. Die gebruik van die oopsiklus-gasturbines bly dus ’n prioriteit vir Eskom.”
Nuwe uitvoerende hoof
Kandidate vir Eskom se volgende uitvoerende hoof sal binne twee weke geïdentifiseer word. Mnr. André de Ruyter, uitvoerende hoof by Eskom, het skielik in Desember sy bedanking aangekondig.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
