Ter illustrasie. Foto: Fredalette Uys
’n Vermeende veedief verskyn weer op Maandag 29 Augustus in die Vryburg-landdroshof nadat 21 bokke op sy bakkie gevind is.
Mnr. Itumeleng Godfrey Setatwe (45) het gister sy eerste verskyning in dié hof gemaak nadat hy op Saterdag 20 Augustus in hegtenis geneem is.
Volgens kapt. Aafje Botma, polisiewoordvoerder, was beamptes van die Vryburg-polisiekantoor op die N18 na Pudimoe onderweg toe hulle ’n verdagte bakkie opmerk. Hulle het die bakkie voorgekeer en deursoek. Daar was 21 bokke op die bakkie.
Setatwe, die bestuurder van die bakkie, is ondervra, maar kon nie eienaarskap van die bokke bewys nie. Hy is vir veediefstal in hegtenis geneem. Met sy aankoms by die Vryburg-polisiekantoor het hy glo probeer vlug, maar twee polisiebeamptes het hom in bedwang gebring.
Die eienaar van die bokke is opgespoor en dit is aan hom terugbesorg.
