In ’n verrassende aankondiging het die landboumaatskappye BKB en KLK Landbou Bpk. bekend gemaak dat die voorgenome aanbod van BKB aan die aandeelhouers van KLK verval het. Dit was glo weens die nie-nakoming van ’n opgeskorte voorwaarde tot die aanbod.
Die partye kon blykbaar nie ooreenkom oor hoe om die waardebepaling van die onafhanklike kundige in die gesamentlike brief aan KLK se aandeelhouers te hanteer nie. Die kundige is deur KLK aangestel om die redelikheid en billikheid van die voorgestelde transaksie te bepaal.
Mnr. Chris Louw, voorsitter van BKB, het aan Landbouweekblad gesê die twee partye kon nie saamstem oor die ruilwaarde en prys wat BKB bereid was om vir KLK se aandele te betaal om ’n meerderheidsbelang in die maatskappy te verkry nie. Volgens hom is daar egter geen kwade gevoelens onderling nie. “Die lang aanloop van meer as ’n jaar wat tot BKB se aanbod gelei het, het deurentyd vriendskaplik geskied. Só ook die besluit om die aanbod terug te trek,” het hy benadruk.
Voorgestelde samesmelting
Louw sê KLK en BKB onderhandel nou die opsie waarin KLK aangebied het om BKB se 20,04% aandele (wat BKB reeds in die maatskappy besit) terug te koop indien die voorgestelde samesmelting nie suksesvol verloop en BKB nie ’n meerderheidsbelang verkry het nie.
“BKB gaan nie nou al ’n nuwe aanbod aan KLK se aandeelhouers maak nie. Daar is nietemin tegniese aspekte waaroor daar nou onderhandel word en waaroor duidelikheid verkry moet word.”
Mnr. Kobus Marais, voorsitter van KLK, sê in sy reaksie dat hy spyt is dat ’n geleentheid vir die aandeelhouers van KLK verbygegaan het. “Samesprekings gaan egter voort om die kwessie oor die hantering van die 20,04% aandeelhouding formeel en vriendskaplik te beëindig.”
28 Maart 2012
