’n 80-jarige boer en sy werknemer is op Woensdag 9 Maart op sy plaas by Umlaasweg by Camperdown deur twee gewapende mans aangerand en beroof.
Kol. Thembeka Mbele, polisiewoordvoerder, sê die voorval het omstreeks 13:00 plaasgevind. Die aanvallers het die boer en werknemer beveel om op die grond te gaan lê waarna hul hande met kleefband vasgebind is.
Die aanvallers het die sleutels vir die hoofhuis geëis, terwyl ’n vuurwapen op die boer en werknemer gerig is. Die boer het dit vir hulle gegee. Die verdagtes het na die hoofhuis gegaan en ’n skootrekenaar, verkyker, herlaaibare lig, oorfone, gholfsak en tuisteaterstelsel gesteel en van die toneel gevlug.
Die slagoffers het daarin geslaag om hulself te bevry en ’n buurman gebel wat dadelik op hul noodoproep gereageer het. Hy het ook die Camperdown-polisie en ander wetstoepassingsagentskappe van die voorval in kennis gestel het.
Die verdagtes, 27 en 32 jaar oud, is naby die toneel opgespoor en in hegtenis geneem. Die gesteelde items en die vuurwapen is in hul besit gevind. Die polisie het vasgestel dat die vuurwapen in 2013 in ’n vorige rooftog in Mpumalanga gebruik is. Tydens dié voorval het vier verdagtes na bewering op 5 Oktober 2013 gedreig om ’n 42-jarige man op 5 Oktober 2013 by Blocksini Stop in Georgedale te vermoor en hom van sy vuurwapen beroof. Die voorval is by die polisie aangemeld en ’n saak van diefstal is geopen.
Profiele sal van albei verdagtes opgestel word om te bepaal of hulle by ander sake betrokke was. Hulle sal na verwagting vandag (11 Maart) in die Camperdown-landdroshof verskyn op aanklagte van diefstal en die onwettige besit van ’n vuurwapen.
