‘n Boer van Harrismith is in die gesig met ‘n mes gesteek nadat hy ‘n staalstruktuur op ‘n plaas van die Suid-Afrikaanse Nasionale Padagentskap (Sanral) afgebreek het.
Luidens ‘n berig op Nuus24.com is die 36-jarige mnr. Tjokkie Venter ook met ‘n ysterpyp geslaan terwyl hy op die plaas Uitvlught met die medewete van Sanral gewerk het.
Sanral het die plaas gekoop as deel van sy beplande uitbreiding aan die N3-roete tussen Johannesburg en Durvan, maar mense woon vir eers steeds op die plaas.
Die plaashuis en pakhuis is reeds afgebreek, en Venter het gister ‘n staalstruktuur ook afgebreek.
Bewoners
‘n Plaasbewoner, sy seun en nog twee mans is intussen in hegtenis geneem. Venter se pa, Albert, was saam met hom op die plaas en het die Polisie ontbied.
Mnr. Piet Roetz, verteenwoordiger vir die plaaslike buurtwag, sê die plaasbewoners sê die plaas behoort aan hulle en nie aan Sanral nie.
‘n Saak van aanranding word deur die Polisie ondersoek.
Bron: Nuus24.com
22 Maart 2012
