Van der Merwe hou in dié aansoek voet by stuk dat die optrede van die Land Bank om sy besigheid te likwideer en sekwestreer kwaadwillig is, en dat regter Mpho Mamosebo in talle gevalle gefouteer het toe sy sy aansoeke om die voortsetting van die bank se skuldinvordering te keer, van die hand gewys het.
Hy maak ook kapsie dat Mamosebo hom en sy regspan as “dwarstrekkerig” in die uitspraak beskryf het.
Van der Merwe wil met sy jongste appèlaansoek die magte van die likwidateurs en trustees om voort te gaan met die verkoop van sy vee en roerende eiendom, opskort. Die likwidateurs en trustees het in Desember 2022 ’n verklarende bevel bekom om die bates te verkoop ondanks sy hangende aansoek om verlof tot appèl na die appèlhof teen Mamosebo se uitspraak van 11 Oktober.
