Suid-Afrika se boere gaan al hoe slimmer moet boer as hulle in die toekoms wil oorleef, aldus mnr. Ernst Janovsky, die hoofbestuurder van Absa Agribesigheid.
Hy sê boere kan nie, soos voorheen, op van kommoditeitspryse oorleef nie.
Hy het op AMT se 11de konferensie oor landbouvooruitskouings in Pretoria gesê: “Kommoditeitspryse het die afgelope tyd sywaarts begin beweeg, so ons kan nie daarop staatmaak om in die toekoms binne die landboubedryf te oorleef nie.”
Twee metodes
Janovsky sê die boer kan deur twee spesifieke metodes oorleef. Die eerste is om meer op die gebruik van nuwe tegnologie te fokus. Die tweede is om ’n skaalekonomie toe te pas deur sy bedrywighede te vergroot.
“Jy gaan jou boerdery moet vergroot, want om te oorleef, gaan jy groter moet boer terwyl jy aan oorhoofse koste moet besnoei.”
Hy sê boere moet weerstoestande en die tydperk wat dit sal duur om ná ’n terugslag te herstel, versigtig in hul risiko-opnames in hul beplanning in ag neem. “Waar dit vroeër jare sowat twee jaar sou duur vir ’n boer om na ’n terugslag, soos ’n misoes, te herstel, duur dit nou drie tot vier jaar.”
Suiwelbedryf
Die suiwelbedryf is egter een van dié waaroor Janovsky bekommerd is.
“As ons kyk na wat die melkboere tans kry, so rondom R3,25 per liter melk, is ’n verhoging binnekort nodig om te keer dat baie van hulle die bedryf verlaat en Suid-Afrika met probleme sit ten opsigte van die plaaslike vraag en aanbod.”
Janovsky meen ’n verhoging in pryse aan boere sal die bedryf die nodige aanmoediging gee om beter te presteer.
14 September 2011
