Sers. Timothy Sam, polisiewoordvoerder, sê die polisie in Calvinia ondersoek ’n saak van poging tot moord nadat Albertus Steenkamp (40) van die plaas Perdekloof glo op Saterdag 25 Maart ’n 22-jarige plaaswerker probeer omry het.
Die polisie se voorlopige ondersoek het bevind dat die werker Steenkamp gekonfronteer het oor ’n loon wat nie betaal is nie. Steenkamp het die werker glo aggressief gevra om te loop. Toe die werker hom weer die volgende dag gekonfronteer het, het Steenkamp hom glo met ’n paal gedreig.
Die werker het besluit om sy besittings te vat en die plaas te verlaat omdat hy volgens Sam vir sy lewe gevrees het. Steenkamp het hom na bewering in sy bakkie gevolg en probeer omry.
Steenkamp is op Maandag 27 Maart in hegtenis geneem. Sy formele borgtogaansoek sal binnekort in die Calvinia-landdroshof aangehoor word. Die polisie se ondersoek duur voort.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
