Die saak waarin ’n boer teregstaan op die vergiftiging van 48 kransaasvoëls op 10 Desember 2013, sal op 14 Oktober in die landdroshof op Molteno dien.
Die boer word deur die Departement Natuurbewaring aangekla vir die onwettige uitplasing van gif in die karkasse van skape wat deur rondloperhonde op sy plaas doodgebyt is.
Me. Kate Webster, ’n bewaringsaktivis van Queenstown het die ontdekking gedoen.
Die voorval is wyd deur verskeie organisasies, soos die Griffon-gifinligtingsentrum, Agri Oos-Kaap, PMF (Predasie Bestuursforum) en RPO, veroordeel aangesien die gebruik van gifstowwe vir die bestryding van probleemdiere onwettig is.
Mnr. Meyburgh Erasmus, voorsitter van die Molteno distriksboere-unie, sê boere het groot simpatie met die betrokke boer en staan verenig agter hom. “Wat hy ook al gedoen het, was nié daarop gemik om aasvoëls uit te wis nie. Dit was die onbedoelde gevolg van iemand wat deur rondloperhonde geteister is en nie deur die Wet beskerm word nie,” het Erasmus aan Landbouweekblad gesê.
