Die saak van ‘n boer wie se lusernlande na ‘n oorstroming deur rou riool van die Umsobomvu-munisipaliteit oorstroom is, se saak word op Colesberg aangehoor.
Luidens ‘n berig van Die Volksblad (23 September) is duisende rande se skade vier jaar gelede in die vlei op mnr. Piet van Wyk se plaas Buffelsvlei aangerig toe die rioolwater sy lusernplante versmoor en vernietig het.
Van Wyk dagvaar die munisipaliteit vir skadevergoeding van R650 369,78 en ‘n bykomende 15,5% rente per jaar vir sy verlies aan produksie na die oorstroming.
Na die oorstroming in Februarie 2006 het riool, menslike afval, en chemikalieë, wat natrium, lood, chloride en nitrate insluit, in die Trappiesdamspruit afgespoel. Dít het ‘n groot land onder besproeiing en ander lusernlande oorstroom.
Plante het gevrek
Van Wyk het getuig dat sy lusernplante weens grondverdigting gevrek het en nie in die opvolgende lenteseisoen weer uitgeloop het nie.
Volgens Van Wyk het van die walle van die spruit ten tyde van die oorstroming gebreek. “Die gemors is in my vlei af, oor my keerwal tot in die lusernlande.” Hy mos van sy lewende hawe weens gesondheidsrisiko van die omgewing onttrek.
Amptenare het saam met Van Wyk glo die vlei besoek, maar volgens hom het van die munisipaliteit se beloftes om die skade tot die omgewing te herstel, niks gekom nie.
23 September 2010
