Die woord “boer” is vir die eerste keer tydens die afgelope ANC-kongres (19 – 24 September) nie as ‘n vloekwoord, soos wat voorheen die geval was, beskou nie, sê me. Tina Joemat-Pettersson, Minister van Landbou, Bosbou en Visserye.
Sy het Vrydag (8 Oktober) tydens Agri SA se jaarkongres, gesê die lede van die ANC het tydens die party se kongres nie kommersiële boere as die vyand beskou nie, maar as ‘n belangrike deel van die land se ekonomie.
“Dit was ook die eerste keer wat ANC-amptenare aanvaar het dat hulle ook namens kommersiële boere moet praat.” Volgens haar het die uitwerking van die sterk rand op landbouers se inkomste ook ter sprake gekom.
Volgens die minister het sy die party, maar ook verskeie ander rolspelers oor die afgelope maande, in kennis gestel van die ongunstige invloed wat goedkoop invoere op die plaaslike landboubedryf asook die ekonomie het.
Plaasmoorde
“Die kongres het ook sy absolute afkeur van plaasmoorde en plaasgeweld uitgespreek. Ek dink dit is iets wat die media nie genoeg aandag aan gegee het tydens die kongres nie, en ek wil dit uitlig,” sê die minister.
Sy sê die media het weereens baie op die uitsprake van mnr. Juluis Malema, leier van die ANC Jeugliga gefokus. “Hieroor wil ek net sê mense moet onthou uitlatings wat individue van die party maak is nie die beleid van die regerende party nie.”
Regering se hulprol
Met die erkenning van die belangrikheid van die landbousektor in die ekonomie sê die minister die ANC het ook erken dat die party en Regering die voedselkrisis in die land, maar ook hoë produksiekoste van boere, moet aanspreek.
“Dié sake en hoe dit deur die droogte, oorstromings en ander verskynsels in klimaatverandering beïnvloed word, is ook as ‘n groot uitdaging geïdentifiseer,” vertel die Minister.
Volgens Joemat-Pettersson het die ANC se kongres besluit om pres. Jacob Zuma en die Kabinet te vra dat die land se plan vir groei en ontwikkeling oor die volgende maand afgehandel moet word sodat die uitwerking daarvan op die ekonomie en die landbou bepaal kan word.
8 Oktober 2010
