‘n Bejaarde vrou van Koster in Noordwes is tydens ‘n plaasaanval doodgeslaan, terwyl haar man ernstig beseer is, sê die SA Polisiediens.
Luidens ‘n berig op News24.com is die 63 jarige mnr. Christiaan Stephanus Erasmus, en sy vrou Marthie Magdalena Donderdagaand, 2 Desember 2010, op hulle plaas aangeval.
Kol. Sam Tselanyane sê die egpaar is glo teen laatmiddag deur drie mans by hulle huis aangeval, terwyl ‘n vierde glo by hulle hek gestaan het. Die mans het die vrou na bewering na hulle kamer gesleep waar haar hande en voete vasgebind is en sy met ‘n 16 pond hamer doodgeslaan is.
Die boer is aan ‘n stoel in die kombuis vasgebind waar hy ook erg aangerand en geslaan is. Die drie mans het glo vyf vuurwapens, klere, juweliersware, ‘n mikrogolfoond, kersgeskenke, selfone en sowat R15 000 se kontant gesteel.
Vier Vrydag aangekeer
“Die Polisie het daarin geslaag om al vier die verdagtes Vrydagaand in Lethabong aan te keer", sê Tselanyane. Een van die verdagtes het voorheen op die plaas gewerk. Die mans is in hegtenis geneem met van die juweliersware en ‘n bedrag van R1500 in hulle besit. Die res van die gesteelde ware is in ‘n huis in Bospoortdam, waar een van die verdagtes se pa werk, gevind.
Die vier mans, tussen die ouderdomme van 16 en 24, sal Maandag (6 Desember 2010) in die landdroshof op Koster verskyn op aanklagte van moord, poging tot moord, huisroof en die besit van ongelisensieerde wapens.
'Bring doodstraf terug'
Intussen sê die Vryheidsfront Plus die doodstraf moet heringestel word vir moordenaars. “Net die doodstraf sal die vlaag van moorde in Suid-Afrika laat afneem,” sê mnr. Pieter Groenewald, die party se woordvoerder oor Polisie.
“Wat kommerwekkend is, is dat plaasmoorde toenemend gepleeg word deur moordenaars wat in groepe optree. In April vanjaar het plaasaanvallers in groepe van tien tot sestien lede opereer in Polokwane en Carolina. Dit skep ‘n Zimbabwe-situasie”, sê Groenewald. Hy sê mnr. Nathi Mtehthwa, die Minister van Polisie “moet wakker skrik” en plaasmoorde ‘n prioriteitsmisdaad verklaar.
Volgens Groenwald vind die meeste moorde onder boere in Suid-Afrika plaas, gemiddeld 313 uit elke 100 000, terwyl die syfer vir moorde onder wetstoepassers 153 uit 100 000 is.
“Die komitee wat plaasmoorde in 2003 ondersoek het, het toe reeds bevind dat die kanse dat ‘n slagoffer in ‘n plaasaanval beseer sal word, twee maal so groot as in transito-rooftogte is. Die kanse dat die slagoffer sal sterf is drie maal so groot as in transito-rooftogte. As die Polisie transito-rooftogte as ‘n prioriteit kan beskou, des te meer behoort plaasmoorde as prioriteit beskou te word,” aldus Groenewald.
Bron: News24.com
4 Desember 2010
