Woede was glo die rede agter die moord verlede jaar van mnr. Johan Strydom van die distrik Buffelshoek, naby Potchefstroom. Luidens ’n berig in die dagblad Beeld (4 Maart) was dít die rede vir die moord wat ’n verdagte in sy verklaring aan die Polisie aangevoer het. Strydom het glo R930 by mnr. Jonathan Sekgone, die verdagte, gevat wat in ’n vroeëre huisbraak gesteel is.
Luidens die verklaring, wat in die Rondgaande Hof in die stad voorgelees is, het Sekgone die 40-jarige Strydom by ’n plaashek met ’n ysterstaaf ingewag. Strydom het glo vir hom probeer weghardloop, maar Sekgone het hom vier keer oor die kop geslaan, sy voete vasgebind en hom agter sy bakkie na die pakhuis gesleep, terwyl Strydom vermoedelik nog lewendig was.
Valse verklaring
Sekgone het wel voorgehou dat dié verklaring vals is, want hy het dit onder dwang gedoen omdat hy deur die Polisie aangerand is. Hy beweer hy was slegs teenwoordig toe die moord gepleeg is. Die medeverdagtes in die saak is mnre. Simphiwe Tueng en Soul Letsie.
Regter Frits van Oosten het egter beslis dat die verklaring en uitwysings wat Sekgone kort ná die moord gedoen het, toelaatbaar is.
Die verhoor word op Woensdag, 9 Maart 2011 hervat.
Bron: Beeld
4 Maart 2011
