’n Boer van Caledon, wat deur die droogte genoop is om sy kudde te verkoop en sy boerderybedrywigheid te staak, is in so ’n mate deur barmhartige Samaritane gehelp dat hy nou sal kan voortboer.
Mnr. Werner Teubes, wat naby Tesselaarsdal in die distrik Caledon boer, sê binne enkele ure vandat hy op die Facebook-groep Landbou Sosiaal ’n inskrywing geplaas het dat sy Boran-kudde te koop is, het hy ’n kontantbedrag as hulp van mnr. Kobus Oosthuizen, ’n Suid-Afrikaanse boer wat tans in Amerika woon, ontvang.
Stoet te koop
“Die droogte het my nou ondergekry en dit reën nie kos nie, so kan ek nie voortgaan nie!” het Teubes geskryf. Hy het 20 stoetborankoeie en 11 kommersiële borankoeie met 20 kalwers te koop aangebied.
“Ek het die inskrywing opgesit en toe ek my oë uitvee, het Kobus uit Amerika aangebied om my te help voer aankoop,” sê hy. “Hy het reguit vir my gesê: ek wil nie hê jy moet jou beeste verkoop nie. En ek wil nie my beeste verkoop nie!” sê Teubes.
Soveel hulp het as gevolg van die inskrywing ingestroom, Teubes het nie geweet watter kant toe nie. Hy sê dis ongelooflik dat die mense so bereid is om te help. “Boere het selfs aangebied om my beeste vir drie jaar te vat en groot te maak,” verduidelik hy. ’n Boer van Bethal het ook bale belowe en nou probeer Teubes om vervoer daarvoor te reël.
Breekpunt
Teubes het verlede jaar begin boer en het in Mei sy eerste kalfseisoen gehad. “Ek het beeste verkoop en derduisende aan voer spandeer, maar dit was net nie genoeg nie. Ek kon net nie meer nie. Ek het nie nóg geld gehad nie,” sê hy.
Na die eerste kallers gebore is, het sy koeie baie maer geword. Teubes het beeste verkoop om ander beeste te voer maar uiteindelik ’n punt bereik waar hy nie verder kon bekostig om voer aan te koop nie.
Hy het aanhou hoop dat dit die volgende dag sou reën. Uiteindelik het dit wel gereën maar hy het besef die koue en reën bring nie dadelik kos nie. Dit het sy beeste net swakker gemaak. “Hierdie beeste waaroor ek al jare droom… ek het besef dis nie so maklik nie.”
Aanhouer boer
Teubes het 31 kleinkudde, 28 kallers en volgende jaar is daar 50 beeste wat gevoer moet word. Hy is vasberade om met die boerdery voort te gaan.
“Dis net hoop, passie en liefde vir beeste. Niks anders nie,” sê hy. Jy kan spaargeld hê maar as die reën nie kom nie is dit soos ’n eindelose pit waar jy jou geld gooi. As dit nie vir hierdie hulp was nie, weet ek nie. Dis net die genade van die Here wat ons gaan deurdruk.”
Ooshuizen werk al vir vier jaar vir ’n Amerikaanse boer en “doen enigiets rondom ’n saaiery”. Oosthuizen sê toe hy die inskrywing op Facebook sien, het hy geweet Teubes is trots op dit wat hy doen.
“Die skenking was net die Here se stem wat vir my gesê het, ‘kom ons help die man’. My hart bloei vir ’n medemens soos hy. Ek sien daagliks op Facebook hoe die boere swaarkry, maar dit het dit uitdruklik uitgewys.”
* Het jy ’n nuuswenk, kommentaar, ’n foto of video wat jy aan ons wil stuur? Gebruik Whatsapp om met ons te gesels by 063 720 3632.
