Ondanks dié onderneming deur OBP vir noue samewerking met die veebedryf deur goeie kommunikasie om te verseker daar word in entstofbehoeftes voorsien, is sommige noodsaaklike entstowwe wéér nie beskikbaar nie. Dít terwyl die hoeveelheid siektes toeneem weens die afgelope jaar se nat seisoen.
“Hulle is uit voorraad met absoluut noodsaaklike entstof wat deur hulle vervaardig moet word. Ons is partykeer vir maande sonder entstof,” sê dr. Neil Fourie, ’n veearts in private praktyk van Middelburg, Mpumalanga. “Die grootste probleem is siektes soos Afrika-perdesiekte in die perdebedryf, bloutong in die skaapbedryf en rooiwater in die beesbedryf. Voorkoming van dié siektes in Suid-Afrika is deurslaggewend om te voorkom dat ons jaarliks verliese van miljoene rande ly. Die staat het altyd die entstowwe verskaf, maar dit is nou al maande lank ’n probleem.”
Fourie is een van talle veaartse en ander belanghebbendes met wie Landbouweekblad gepraat het, en almal bevestig dié stand van sake.
