Sprinkane sak weer op verskeie dele van die Noord- en Wes-Kaap toe, en boere word gevra om swerms aan te meld.
Mnr. Johan van Rensburg, hoofbestuurder van Agri Noord-Kaap, sê tans word sprinkane in 22 distrikte in die twee provinsies gespuit.
“Die sprinkane is gelukkig nog in die voetganger-stadium – die eerste fase van ontwikkeling – so dit is maklik om hulle te spuit en te bestry,” verduidelik Van Rensburg.
Hy sê dit is wel belangrik dat die sprinkane in dié stadium gespuit moet word, want as hulle die vlieërstadium bereik het, vlieg hulle rond en kan hulle net in die nag gespuit word.
Skade
Van Rensburg sê die meeste swerms kom tans in die omgewing van Beaufort-Wes voor. Hy het ook gehoor van swerms naby Aberdeen in die Oos-Kaap. In die Noord-Kaap word veral Namakwaland en Boesmanland geraak.
“In die verlede het die ouens al groot skade weens sprinkane gehad, so ons doen ’n ernstige beroep op boere en sprinkaanbeamptes om swerms aan te meld, sodat hulle vroegtydig gespuit kan word,” sê Van Rensburg.
Die muggies
Intussen lyk dit asof die muggieplaag wat boere naby die Oranjerivier weke lank moedeloos gehad het, afneem. Van Rensburg sê sedert die eerste geslaagde gifspuitsessie het nog een plaasgevind en die muggies is besig om minder te word.
“Die baie warm weer help ook dat die muggies vinniger vrek. In die koeler weer kon hulle weke lank leef,” vertel Van Rensburg.
25 Oktober 2011
