Mnr. Wilco Fourie, voorsitter van die Oranjerivier-landbou-unie, het laat Vrydagmiddag gesê te oordeel aan die beskikbare syfers oor die Vaal- en Oranjerivierstelsels word in dié stadium verwag dat die Benede-Oranjerivier teen Maandag 20 Februarie 'n vloei van sowat 3 000 kubieke meter per sekonde (kumek) kan bereik. Dit is meer as die hoogtepunt van sowat 2 500 kumek wat vroeër vandeesweek verwag is.
Boere met wingerde en landerye aan die rivier se groot skade begin gewoonlik wanneer die riviervloei sowat 3 500 kumek bereik.
“Die rivier vloei nou reeds teen sowat 2 000 kumek by Katlani.” Dit is naby Douglas en is die eerste meetpunt ná die samevloeiing van die Oranje- en Vaalriviere.
“Die invloei in die Vaaldam is besig om skerp toe te neem,” sê Fourie. “Die departement van water en sanitasie verwag 'n hoogtepunt in die invloei van rondom 2 200 kumek teen 20 Februarie en ’n uitvloei van 1 700 kumek op dié dag. Dit is gegewe die reën wat rééds geval het.
“Aan die Oranjerivier se kant lyk dit asof die invloei afneem. Die Gariepdam het die hoogtepunt van sy uitvloei bereik,” sê Fourie.
Die departement van water en sanitasie se syfers van vroeg vanoggend het getoon dat die Krugersdriftdam byna 111% vol was, die Gariepdam 112%, die Vanderkloofdam byna 108%, die Vaaldam 110% en die Bloemhofdam 108%.
Die departement het vanmiddag in ’n verklaring gesê gister was ses sluise van die Vaaldam reeds oop en vandag is ’n verdere vier oopgemaak, sodat tien sluise in totaal nou oop is.
Die uitvloei uit die Bloemhofdam was gister 1 400 kumek en is vandag verhoog na 1 800 kumek.
Die uitvloeie sal verander word afhangend van die weerstoestande in die volgende paar dae.
Me. Wisane Mavasa, woordvoerder van die departement, het boere langs die waterstelsels gevra om gereed te wees en voorbereidings te tref om verlies aan mense- en dierelewens asook skade aan eiendom te voorkom wanneer watervlakke styg.
Vrydag 17 Februarie 2023 #Oranjeville #Vaaldam. Nog 4 #sluise word oop gemaak vandag dit is n totaal van 10 wat sal oop wees. Lede stroom af, by Club 40, #Parys, #Orkney en nog talle meer, ontruim en wees veilig asb.??Theresa du Toit pic.twitter.com/zmzraDRpKo
— ReenvalSA (@ReenvalSA) February 17, 2023
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
