“Een van ons grootste dilemmas is dat stedelike vleisverbruikers nie slim koop en hul inkopies vooruit beplan nie.
“Hoeveel mense in stede weet werklik hoeveel hulle vleis per kilogram kos, en hoeveel gaan soek werklik op ’n ander plek as hy meen sy supermark of slaghuis se prys is te hoog?”
Mnr. André Ferreira, voormalige voorsitter van die Rooivleisprodusente-organisasie (RPO) in die Vrystaat, meen as verbruikers beter ingelig word, kan hulle wat vleispryse betref druk op supermarkte en die kleinhandel uitoefen. Dít kan lei tot laer vleispryse, wat die verbruik van vleis kan verhoog, en dit kan uiteindelik in boere se guns tel.
Hy sê tans kry ’n boer R15,25 per kilogram vir speenkalwers wat hy lewer. In Desember verlede jaar het dié prys op tussen R23,00 en R25,00 per kilogram gestaan.
Weiding
Intussen trek veeboere in die sentrale dele van die land swaar wat weiding betref. Ferreira, wat buite Bethlehem in die Oos-Vrystaat boer, sê die reën wat in Junie voorgekom het, het die toestand van sy weivelde ’n bietjie verbeter.
“Ons hoop dat dié reën en ’n bietjie stofnat in September ons sal deurtrek na Oktober, hoewel die veld al plek-plek wil bot ná die reën,” vertel Ferreira.
Karige weiding lei daartoe dat boere meer op veevoer moet staatmaak. Dít verhoog produksiekoste, wat die veeboer se reeds lae inkomste verder knou.
Ferreira sê die droogte, wat tot minder weiding en die verkleining van kuddes gelei het, is die grootste kwessie rakende boere se vleisprys-situasie.
