Ná vloedwater vroeër vanjaar groot skade in die Noord-Kaap veroorsaak het, hou boere asem op oor die komende reëntyd.
Mnr. Jors van der Westhuizen, ’n boer van die distrik Grootdrink, sê as oorstromings die boere langs die Oranjerivier nou weer tref, sal dit “fataal” wees.
Hy sê die proses om noodwalle te herstel met behulp van die ramphulpgeld wat die staat nou toegestaan het, is onderweg. “Van die georganiseerde landbou se kant af is ons kwaai aan die roei om die walle reg te maak of hoër te maak.”
“Die vrese vir nog vloedwater is egter beslis daar. As ons nóg water van 5 m hoog gaan kry, gaan ons groot moeilikheid hê,” vertel Van der Westhuizen.
Opgaardamme
Mnr. Johan van Rensburg, hoof uitvoerende beampte van Agri Noord-Kaap, sê dit is “bitter moeilik” om die water van opgaardamme in die Vaal- en Oranjerivier reg te bestuur.
Die Departement van Waterwese is tydens die oorstromings erg gekritiseer oor die bestuur van water in die damme.
“’n Mens moet onthou, dié damme is besproeiingsdamme en opgaardamme. Dit beteken dat dié damme se vlakke nie sommer net verlaag kan word nie, want jy weet nooit wanneer die reën dalk te min is en jy dan nie genoeg water het nie. Die vreemde weer wat ons tans ervaar, bemoeilik die proses ongelooflik baie,” sê Van Rensburg.
Hy sê hulle is nou bekommerd oor die invloed wat die terughou van water vir padwerke op die rivierstelsel kan hê. Naby Keimoes word die pad en brûe verbreed, en om dít te kan doen, moet die rivier se waterinhoud op sy absolute minimum gehou word. As daardie water losgelaat word, kan dit ’n invloed laer af in die rivier hê.
Weervoorspelling
Intussen het die Suid-Afrikaanse Weerdiens aan Landbou.com gesê dat hy baie onseker is oor reënpatrone tydens Desember vanjaar en Januarie aanstaande jaar.
Mnr. Asmerom Bereki, voorspeller, sê volgens die jongste langtermyn-vooruitskouing word normale tot droë toestande vir die noordelike dele van die land in Desember, Januarie en Februarie voorspel.
Volgens ’n voorspelling vir Januarie, Februarie en Maart word bogemiddelde nat toestande in Noordwes en Gauteng verwag. ’n Langtermyn-voorspelling wat in Oktober die jaar gedoen is, het bogemiddelde reënval vir Gauteng voorspel. Bogemiddelde reënval in dié provinsie het ’n groot invloed op dié twee riviere.
6 Desember 2011
