Die betreders knip plase se heiningdrade en jaag beeste op die grond in. “Dis ’n mengsel van beeste. Sommige is opkomende boere s’n, ander is kommunale boere s’n. Baie van die beeste het nie brandmerke op nie. Die moontlikheid dat dit gesteelde beeste is, kan nie uitgesluit word nie,” sê mnr. Naudé Pienaar, assistent-hoofbestuurder van Agri Noordwes.
Hy sê die betreders intimideer ook boere, hits mense aan tot geweld en rig groot skade aan. Hulle beskadig nie net infrastruktuur nie, maar as die boer nie vinnig genoeg optree nie, stuur hulle ’n veewagter om ’n tydelike skuiling op die grond op te rig, wat die boer met ’n situasie van grondbesetting en gevolglik regstappe laat.
Volgens Pienaar is ses boere in die distrik Klagamien naby Tosca al deur die probleem geraak. “Die situasie duur al langer as ’n jaar voort.” Die betreders het verlede jaar begin om van die plase te teister, waarna Agri Noordwes opgetree het.
“Agri Noordwes vervul ’n leidende rol met skakeling en oorreding van die SAPD-bevelstruktuur om die voorgeskrewe instruksies en werkswyses om hierdie situasie te hanteer nougeset toe te pas en die vereiste beskerming aan benadeelde grondeienaars te verleen.”
Ingryping
Na aanleiding van die eerste voorvalle verlede jaar het Agri Noordwes met die provinsiale departement van grondsake, die nasionale vervolgingsgesag, die provinsiale SAPD-bevelstruktuur, die kantoor van Noordwes se premier, die plaaslike SAPD en ander burgerregte-organisasies geskakel om hulle in te lig oor die gebeure en die dreigende en uittartende gedrag van die oortreders.
“Ná die aanvanklike ingryping en optrede was daar ’n tydperk van beperkte stabiliteit, maar die situasie het nou weer opgevlam met beeste wat ingejaag is op private grond, heinings wat geknip is, selfs ’n hek wat aangebring is en openlike intimidasie en dreigemente teenoor plaaseienaars,” sê Agri Noordwes luidens ’n verklaring.
Die organisasie het nou weer met belanghebbendess in gesprek getree en ook met vennote geskakel om met moontlike oplossings vorendag te kom. Die SAPD en die premier se kantoor is weer betrek en die interdik wat vroeër teen die grondbesetters verkry is, is uitgebrei en herbevestig. “Ons wil ons dank en waardering uitspreek teenoor ons lede wat ondersteunend betrokke is, veral die spesifieke grondeienaar, wat in baie moeilike omstandighede wetsgehoorsaam, kalm en verantwoordelik optree,” sê Agri Noordwes.
Die organisasie is bekommerd oor die dreigemente en gerugte van ’n uitbreiding van sulke voorvalle in naburige gebiede wat die ronde doen. “Ons versoek alle grondeienaars om in ooreenstemming met die ooreengekome gebeurlikheidsbeplanning en instruksies op te tree en georganiseerd en gedissiplineerd saam te staan en mekaar te ondersteun om hierdie ernstige bedreiging teen te staan.
“Agri Noordwes en sy strukture doen alles moontlik om op kort termyn stabiliteit te verkry en om ’n langtermynoplossing te verkry om die situasie te beredder,” lui die verklaring.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe. Volg ons op WhatsApp om daaglikse landbounuus op jou selfoon te ontvang.
