“Die uitdagings in die landbou is groot en word nou na ‘n punt gedryf,” sê mnr. Frans van den Bergh, herverkose voorsitter van Agri Gauteng, in sy jaarverslag op die organisasie se jaarkongres wat in Pretoria gehou is.
Volgens hom is daar te min boere in Gauteng wat by die organisasie betrokke is. Dit veroorsaak dat Agri Gauteng weens ‘n gebrek aan geld nie sy die doelstellings van transformasie, in besonder grondhervorming, sosiale uitdagings, soos werkskepping, en waardekettingbestuur kan nastreef soos hy graag wou nie.
Die organisasie kry gelukkig steun van Agri SA. Van den Bergh wonder hoekom so min Gautengse boere betrokke is.
“Gee die res van die boere in Gauteng nie om nie? Gaan dit te goed met hulle boerderye? Het hulle oorgegee teen die aanslag op die landbou? Of is hulle net gewoon ‘roofkykers’ – pluk al die vrugte van harde werk van ander sonder om enige bydraes te lewer?”
Ondanks sy beperkinge het Agri Gauteng die afgelope twaalf maande weer sy verskillende portfolio’s aan die gang gekry, nuwe lede gewerf en nuwe boereverenigings gestig.
Van den Bergh het ‘n beroep op boere gedoen om betrokke te wees. “Jul aktiewe deelname is absoluut noodsaaklik vir die behoud van die organisasie.”
