Suid-Afrika kan dit nie bekostig om selfs een kommersiële boer te verloor nie, hetsy weens ‘n plaasmoord of deur emigrasie, het me. Tina Joemat-Pettersson, Minister van Landbou, Bosbou en Visserye op ‘n besoek aan ‘n plaas by Senekal gesê.
“Ons het julle nodig. Ons kan nie Suid-Afrika se landbou sonder wit boere laat groei nie,” het sy gesê toe sy boere en werkers op die plaas Makolobane van mnr. Pitso Sekhoto toegespreek het. Die besoek was deel van ‘n nuwe veldtog deur haar departement om die kollig op suksesvolle swart boere te laat val.
“Elke kommersiële boer het dekades se kennis en vaardighede wat Suid-Afrika nodig het. Ons jaag hulle (boere) nie weg nie. Ons vra dat julle asseblief nie summier die land moet verlaat nie. Moenie sak en pak trek nie. Brei eerder jul ondernemings na ander lande toe uit. Dit is vir ons bejammerenswaardig as ‘n boer die land verlaat, want ons kan nie selfs net een boer verloor nie.”
Joemat-Pettersson het haar ook sterk teen plaasaanvalle uitgespreek, en gesê die Regering gaan nuwe klem op die beveiliging van landelike gebiede plaas. Sy en mnr. Nathi Mthethwa, die Minister van Polisie, werk ten nouste hierin saam. Mthethwa gaan binnekort elke provinsie besoek om ‘n bestekopname van landelike veiligheid te doen, het sy gesê.
Lees meer in Landbouweekblad se volgende uitgawe.
13 Januarie 2011
