’n Man is vanoggend in ’n skermutseling met die polisie en boere in die Amersfoort-distrik dood nadat hy en nog ’n verdagte vir die polisie weggejaag het. Die voertuig waarmee die mans gery het, is deur twee beamptes in Amersfoort as ’n gesteelde voertuig geïdentifiseer, waarna hulle dit wou aftrek. Die mans het in die rigting van Panbult weggejaag.
Mnr. Henry Geldenhuys, ondervoorsitter van die TLU SA, sê van die boere in die omgewing het op die radio-oproep om die voertuig te help keer, gereageer. “Ons het ’n padblokkade naby Panbult opgerig.”
Die mans het voordat hulle die padblokkade bereik het, op ’n grondpad afgedraai. Daar het hulle ’n boer oorrompel en sy bakkie gevat. Die polisie wat hulle van Amersfoort af agtervolg het, het hulle gevolg en is ook deur die mans oorrompel waarna húlle voertuig gesteel is.
Tweede polisievoertuig
’n Tweede polisievoertuig het ook op die plaaspad gery, en die mans het die bakkie afgtrek, die twee beamptes ook oorrompel en die tweede voertuig en een beampte se vuurwapen gebuit. Die vier beamptes en boer is ongedeerd.
Die verdagtes het toe in die rigting van die padblokkade gevlug. “Hulle het kort voor ons gestop en probeer wegjaag. Toe ry hulle hulself vas in boere wat van agter af gekom het. Die mans het toe sowat 30 m van ons bakkies af op ons losgebrand,” vertel Geldenhuys.
Die boere het teruggeskiet en een van die verdagtes is noodlottig gewond. Die tweede het probeer wegjaag, maar het op ’n plaaspad uit die bakkie geklim en homself oorgegee. Drie AK 47's, een R5-polisiewapen en een polisie-handpistool is in die bakkie gevind.
“Ons is baie dankbaar dat ons oorleef het met die skote wat so naby ons verbygeflits het,” aldus Geldenhuys. Hy sê die mans was vermoedelik deel van ’n sindikaat wat kitsbanke opblaas, want ’n groot hoeveelheid plofstof is in die aanvanklike voertuig gevind.
