Baie boere se kontantprobleme is 'n krisis wat in die komende maande net verder gaan ontwikkel, sê mnr. Christo van der Rheede, adjunk-uitvoerende direkteur van Agri SA.
Banke sien nog nie noemenswaardige getalle boere wat nie hul verpligtinge kan nakom nie, maar Van der Rheede verwag dit kan al hoe meer voorkom. “Ons gaan die nadraai van die droogte eers volgende jaar sien.”
Hy sê baie boere beskou die betaling van leningspaaiemente as uiters belangrik, om seker te wees hulle kan weer krediet kan kry. Hy is egter bekommerd of boere werkerslone en vir kos op die tafel gaan kan betaal. In die somersaaigebied is die afrekeningsdatum vir produksielenings 30 Augustus.
Agbiz se opname
Die landbousakekamer Agbiz het einde Julie gesê 'n opname wys die meeste boere hier sal hul produksieskuld kan betaal.
Van der Rheede sê dit is egter net een deel van die verhaal en behels “ 'n tegniese oefening” van banke se kant om te kyk wat syfers oor betalings sê. “Van die boere is te trots en skugter om te praat.”
Van der Rheede moedig boere aan om met die provinsiale landbou-unies kontak te maak om te hoor hoe hulle hulle hulp kan kry, selfs al is hulle nie lede nie.
“Ons moet nou 'n wyer perspektief hê. Dit is belangrik om boere op plase te hou, ter wille van voedselsekerheid en werksgeleenthede.”
* Lees ook: Maermaak-en-doodmaak-maand kom
