Mnr. Max du Preez, politieke ontleder en oud-joernalis, sê as die land se produsente faal, faal Suid-Afrika, want sonder ’n gesonde landbou gaan die land gou ’n mislukte staat word.
Du Preez het op die jaarkongres van Vrystaat Landbou (VL) in Bloemfontein gesê dit is tyd vir landbouers in Suid-Afrika om baie meer strategies te raak.
“Neem die wind uit die seile van julle kritici en teenstanders. Tree só op dat mense verby hul vooroordele dat julle gronddiewe is, kyk en julle as werkgewers en kosvoorsieners sien,” was sy pleidooi. “Neem inisiatiewe wat die land se mense van jul goeie trou en bedoelinge oortuig.”
Du Preez het bepleit dat die produsente self die voortou met die vestiging van nuwe swart boere neem en hulle help om ’n sukses te maak.
“Maak dit onmoontlik vir die willewragtags en die korruptes en die magsbeheptes om julle in ’n hoek te dryf deur seker te maak julle word deel van die oplossing. Wys vir die hele land en die hele wêreld wat dit werklik beteken as ons sê: ’n Boer maak ’n plan.”
Grond lei tot groot konflik
Die konflik tussen wit en swart in Suider-Afrika die laaste 200 jaar en vandag nog draai om grond. Vir Afrikaners en vir swart mense is grond ’n hoogs emosionele ding.
“Dit is tyd vir ons almal, ook die boere van die Vrystaat, om ons vooroordele, ons dogma en ons ideologieë waaraan ons so vaskleef, vir gesonde pragmatisme en teen-intuïtiewe besluit en leierskap te verruil,” sê hy.
Die boere van Suid-Afrika sukkel om die onregverdige, slegte beeld wat hulle onder dele van die swart bevolking het, af te skud. “Julle sal doodgewoon harder daaraan moet werk, hoe onredelik jul kritici ook al is.”
Hy het bevestig dat die ANC nie die grondwet kan verander nie omdat hulle nie genoeg steun in die Parlement het en nooit sal hê nie. “Ek staan daarby. Ek dink daar is ’n uitstekende kans dat die ANC goed onder die 60 persent steun in die volgende verkiesing in 2014 gaan kry en ek is oortuig daarvan dat hulle minder as 50 persent in 2019 gaan kry.”
Die korrupsie, ryk lewenstyl en ondoeltreffendheid van die ANC-regering is deels daarvoor verantwoordelik.
Volgens Du Preez moet almal kalm bly as Julius Malema en ander blaas en raas oor grond afvat en nasionaliseer, aangesien die ANC doodgewoon nie ’n groot genoeg meerderheid in die Parlement het om die Grondwet te verander nie en dit ook “nooit sal hê nie”.
