Die onlangse gure weer het daartoe gelei dat helikopter-personeel, paramedici en vrywilligers kospakkies met ’n Oryx-helikopter op tien afgesonderde plase in die distrik Beaufort-Wes moes aflaai. Die kospakkies is deur die Mustafadin-stigting in Kaapstad geskenk.
Paaie is onbegaanbaar gemaak deur sneeu wat die afgelope naweek in die omgewing geval het. Hoewel temperature intussen geklim het, word nóg koue weer teen die komende naweek verwag.
“Ons almal sit en kyk nou maar wat die weer maak. Die vraag is wanneer die sneeu gaan smelt,” sê mnr. Déan Gous, sekretaris van Agri Wes-Kaap se distrikslandbouvereniging Beaufort-Wes.
Mnr. Malcolm Lawrence, bestuurder van beskermingsdienste by die Beaufort-Wes se munisipaliteit, sê egter dit wil voorkom asof die grootste weerprobleme in die omgewing vir eers verby is.
Bron: Die Burger
