Kapt. Dineo Sekgotodi, polisiewoordvoerder, sê mnr. Cornelis Johannes Uys (60) en sy seun, mnr. Cornelis Johannes Albertus Uys (23), is op Sondag 3 Julie deur die Valke se ondersoekeenheid vir ernstige georganiseerde misdaad op aanklagte van mensehandel in hegtenis geneem.
Hulle word saam met twee ander verdagtes, mnre. Carlos Bernardo Guambe (34) en Gabriel Bernardo Guambe (32), aangekla van die mensehandel van 39 mense – sewe vroue, nege kinders jonger as vyf en 23 mans ouer as 18. Die Guambes is op 24 Junie in hegtenis geneem toe die slagoffers van ’n plaas in Dullstroom gered is.
Sekgotodi sê dit blyk dat die slagoffers van Mosambiek af kom en per minibus na Suid-Afrika gebring is vir beter werksgeleenthede. Die slagoffers is tot by die grens gebring waarna hulle deur ’n rivier beweeg het om toegang tot Suid-Afrika te verkry. Daarna is hulle met ’n minibus na Lydenburg geneem.
Albertus en een van die Guambes het glo dan die bestuurder van die minibus betaal om die slagoffers na die plaas te neem.
Sekgotodi sê daar is gedurende die polisie se ondersoek bevind dat die Guambes onwettig in die land is. Bykomende aanklagte van die oortreding van immigrasiewetgewing is teen hulle ingedien. Hulle bly in aanhouding tot die saak op 11 Julie weer in die hof voorkom.
