"Supermarkte soos ons dit ken gaan in die toekoms nie meer bestaan nie: As boere slim is, gaan hulle van sosiale netwerke soos UberFresh begin gebruik maak om hul produkte regstreeks by verbruikers af te lewer." Só sê mnr. Ernst Janovsky, hoof van Absa Agribesigheid se sentrum vir uitnemendheid.
Hy het by die Subtrop-bemarkingsimposium in Nelspruit gesê boere moet hul denke oor die landbou en die bemarking van hul produkte verander.
Me. Khanyi Dhlomo, uitvoerende hoof van Ndhalo Media, het haar bemarkingskennis met boere gedeel en sê verbruikers wil boere se stories hoor. Sy wys daarop dat dienste, soos Uber, hand-aan-hand met sosiale media funksioneer en waarsku dat maatskappye wat nie met hul kliënte op sosiale media kontak maak nie, nie in die toekoms gaan voortbestaan nie.
Slimfoon-toep bereken koste
Uber is 'n wêreldwye vervoermaatskappy wat mense wat vervoer nodig het deur 'n slimfoon toep met geregistreerde Uber-bestuurders in hul private voertuie verbind. Kostes beloop min of meer dieselfde as 'n huurmotor, maar geen kontant wissel hande nie. Die slimfoon-toep bereken self die koste en dit word outomaties van die kliënt se kredietkaart afgetrek. UberFresh en UberEats lewer kos op dieselfde beginsel by kliënte af. Dit kan in die toekoms dus moontlik wees om 'n varsproduktemandjie direk by die boer te bestel.
Om dit reg te kry sal boere moet bemark en hulle moet weet hoe verbruikers verkies om hul inligting te kry en watse inligting hulle wil hê. Dhlomo sê om bloot 'n produk te adverteer is nie meer goed genoeg nie, dit gaan oor die storie agter die produk en die verband tussen die produsent en sy mark. "Mense weet wat hulle wil hê. Hulle wil hoor wat jy, die produsent, daaroor sê, hoe jy dit produseer en hoe jy as boer teenoor die verbruiker ingestel is."
Die sleutel is slimfone en tablette
Dhlomo sê die sleutel tot bemarking is slimfone en tablette. "Van die meer as twee miljoen mense wat Ndhalo Media daagliks gebruik, vind 70% van die kontak deur sosiale media op mobiele slimtoestelle plaas." Sy meen boere moet hul stories oor sosiale netwerke aan hul teikenmarkte oordra, verkieslik met videogrepe en slim visuele aanbiedings.
Sy sê om dit doeltreffend te doen moet boere self bewus raak van wat op sosiale media aangaan en dan aan maniere dink om hul eie stories en hul produkte relevant te maak tot die onderwerp van die dag, en dit so aanbied.
Verbruikers raak ook al hoe meer gesteld op die onderliggende waardes van maatskappye en sal eerder 'n produk koop as hulle weet dat die vervaardigingsproses met 'n verantwoordelikheid teenoor werkers, gemeenskappe en die aarde bedryf word. "Dit is die tipe stories wat julle moet vertel," sê Dhlomo.
