Die Minister van Landbou is slegs deels korrek as sy beweer dat boere die land verlaat as gevolg van die misdaad. “Sy is egter totaal verkeerd as sy beweer dat boere nie die land verlaat nie, maar vlug. Ons boere was nog nooit en is nie bang nie,” sê mnr. Ben Marais, voorsitter van die TLU SA.
“Suid-Afrika se tradisionele kommersiële boere sien al vir eeue kans om die wispelturige klimaat te trotseer, vreesloos. Ons boere-voorouers was bereid om vir hulle grond en vryheid oorlog te maak teen die grootste wêreldmoondheid van daardie tyd. Om ons as vlugtelinge te wil brandmerk, is ‘n belediging vir elke boer,” sê mnr. Marais.
Die TLU SA moedig boere aan om in Suid-Afrika te bly en die land van voedsel en vesel te voorsien.; “Ons boere kan dit doen, want hulle het kundigheid oor dekades en geslagte heen opgebou.”
Mnr. Marais wys daarop dat die misdaad en plaasmoorde inderdaad ‘n saak is wat die boere erg grief. “Maar ons boere is toenemend besig om hulle daarvoor te staal, met beter veiligheidsmaatreëls, strenger keuring van werkers en die vorming van plaaswagstelsels. Maar daar is ander sake wat boere laat kyk na ander geleenthede, soos:
Die onsekerheid oor grondhervorming.
Dreigemente van onteiening sonder behoorlike vergoeding.
Permanente verblyfreg van vreemdes op plase.
Verkrummelende infrastruktuur.
Werkgewer-onvriendelike arbeidswetgewing.
Buitensporige belasting op landbougrond.
Besoedelde water vir landbou-doeleindes.
Belasting op water wat God geskep het.
As na hierdie en ander sake gekyk word, raak dit soms te veel vir boere. Terwyl die TLU SA landbou-kundigheid in Georgië verskaf en hy oorval word met navrae van individuele boere wat geleenthede daar wil ondersoek, bly die die TLU SA by sy standpunt dat Suid-Afrikaanse, en by name Afrikanerboere, in Suid-Afrika hoort.
“Maar ons het begrip daarvoor dat boere die politieke onsekerhede en gevare as die grootste bedreiging vir die landbou sien en vroegtydig na moontlike alternatiewe wil begin kyk.
“Die moontlike uitvloei van kundige boere uit die Suid-Afrikaanse landbousektor, kan slegs deur die Regering gestuit word. Die minister moet dus die hele landbouspektrum in oënskou neem, en nie net misdaad blameer vir vertrekkende boere nie,” sê Marais.
13 Januarie 2011
