Boere in KwaZulu-Natal het onlangs hulle tweede agtereenvolgende oorwinning teen die eksplorasie van skaliegas in dié provinsie behaal.
‘n Hofbevel het mnr. Mosebenzi Zwane, Minister van Minerale Sake, voorlopig verbied om mynregte aan die maatskappy Rhino Oil and Gas Exploration toe te ken.
Dié maatskappy, die Departement van Minerale Sake, sowel as die Petroleumagentskap van Suid-Afrika (Pasa) se aansoek om minerale regte op sowat 800 000 ha in die noorde van KwaZulu-Natal is vroeër vanjaar afgekeur.
Oorwinning
“Hoewel dié ‘n tydelike interdik is, wat slegs finaal sal word wanneer die meriete van die aansoek in die hof bespreek is, is dit steeds ‘n groot oorwinning vir ons boere,” het me. Sandy la Marque, uitvoerende hoof van Kwanalu, in 'n verklaring gesê. Die twee sake saam het betrekking op sowat 1 600 000ha en meer as 15 000 plase in die provinsie.
“Ons weet daar lê nog ‘n lang pad voor in die saak maar ons is verheug deur beide beslissings van die hof. Die impak en uitkomste van eksplorasie sal groot en langdurige gevolge hê – nie net vir die landbou nie maar vir almal wat in KwaZulu-Natal bly.
“Landbou is hier om te bly en ons doelwit is om veilige kos en volhoubare werksgeleenthede aan die mense hier te verskaf,” het La Marque gesê.
Diegene wat ‘n bydrae tot die regsinisiatiewe rondom skaliegaseksplorasie wil maak, kan Kwanalu kontak by ethel@kwanalu.co.za of 033 342 9393.
