“Ons kan met reg daarop aanspraak maak om gehoor en tegemoetgekom te word oor sake wat ons ten nouste raak. Ons kan en wil ‘n bydrae lewer om demokrasie vir almal in dié mooi land van ons te laat werk,” sê mnr. Johannes Möller, voorsitter van Agri SA.
Tydens sy voorsittersrede Donderdag (7 Oktober 2010) by die organisasie se jaarkongres op Muldersdrift, het Möller gesê dat kommersiële landbouers ‘n billike geleentheid moet kry om hul standpunte te stel oor kwessies wat hul regte en toekoms raak.
Voedselsekerheid
Möller sê hoewel ‘n groot deel van die land se verbruikers vanweë hulle sosio-ekonomiese omstandighede aan broodgebrek ly, ken die hedendaagse Suid-Afrika nie voedseltekorte nie.
Volgens Möller was daar nog altyd genoeg voedsel op nasionale vlak beskikbaar. Hy meen dat dit dalk daartoe bydra dat die publiek voedsel as ‘n gegewe beskou, en dit wat vir die suksesvolle voortbestaan van die plaaslike landbou nodig is, gevolglik onderwaardeer.
“Hoe verstaan hulle, meer nog dié wat aan voedselgebrek ly, die kwellinge wat kommersiële boere het rakende prysdruk wanneer daar nie voldoende markruimte vir goeie opbrengste is nie?” het hy gevra.
Verantwoordelikheid
Die Regering het volgens Möller die mandaat en verantwoordelikheid om van dié uiteenlopende persepsies, probleme en verwagtinge sin te maak en die situasie só te bestuur dat dit die ekonomie en samelewing sal bevoordeel.
Met al dié uitdagings wat voedselsekerheid beïnvloed, meen Möller ‘n bepaalde raamwerk moet tot stand kom oor die verantwoordelikhede van die Regering, individue, ondernemings en die burgerlike samelewing. Hy sê die raamwerk moet tot stand kom met behulp van debatvoering oor die landbou- en landbou-ontwikkeling binne die land se Grondwet.
“Die gevolgtrekking waartoe ek kom is dat dit vir die Regering aangewese is om toe te sien dat die kommersiële landbou gedy en sodoende te verseker dat voldoende voedsame voedsel plaaslik en op ‘n mededingende basis geproduseer word,” sê Möller.
7 Oktober 2010
