WWF Suid-Afrika, die WWF Nedbank Green Trust en Food Forward SA het The Behaviour Change Agency (BCA), ’n gedragswetenskapnavorsingsmaatskappy in Kaapstad, opdrag gegee om dié studie oor die vermorsing van voedsel te onderneem.
Die studie het ook ondersoek ingestel na boere se bewustheid, houdings en gedragspatrone wat voedselvermorsing betref, die waarde wat hulle aan die vermindering van voedselvermorsing heg, en die praktyke wat hulle inspan om voedselvermorsing te bestuur.
Die studie het bevind dat hoewel voedsel reg oor die verskillende fases van die voedselvoorsieningsketting vermors word, vind 34,3% van Suid-Afrika se totale voedselvermorsing in die primêre produksiefase plaas. Tog meet minder as 40% van boere hoeveel voedsel op die plaas verlore gaan.
Omgewing, kwessies dra ook by
Omgewingsfaktore lewer volgens die studie se bevindinge ook ’n groot bydrae tot die vermorsing van voedsel. Daar is bevind dat veral buitentydse weer, asook plae en siektes wat ’n hele oes kan uitwis, tot grootskaalse vermorsing kan lei.
Swak beplanning, insekdoders wat verkeerd gebruik word, en ’n gebrek aan opleiding lewer ook ’n bydrae.
Die studie het bevind dat unieke probleme Suid-Afrikaanse boere in die gesig staar en verder tot voedselvermorsing bydra, soos onderbrekings van die koueketting weens beurtkrag, asook skade aan vragmotors en vertragings as gevolg van herleidings gedurende verlede jaar se onluste.
Boere wíl minder voedsel vermors
Dit is egter baie bemoedigend dat al die boere wat aan die studie deelgeneem het, aangedui het dat hulle voedselvermorsing op hul plase wil hokslaan aangesien dit finansieel sinvol sou wees, maar ook voedselsekerheid sal steun.
Die volgende stap vir die BCA se navorsers is om met intervensies vir gedragsverandering vorendag te kom wat op plaasvlak getoets kan word.
* Boere met voedsel wil skenk wat vir menslike gebruik geskik is, maar hulle nie self kan vervoer nie, kan Food Forward SA kontak by 021 531 5670 of info@foodforwardsa.org. Besoek foodforwardsa.org vir meer inligting.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
