Ná maande in die oefensaal was verskeie boere op 19 Maart onder die 680 spanne wat op die Meerendal-wynlandgoed naby Durbanville weggespring het vir die Absa Cape Epic. Dit strek oor agt dae en is een van die wêreld se moordendste bergfietswedrenne.
Thys Louw van Diemersdal naby Durbanville meen dis geen verrassing dat boere so ’n voorliefde vir hierdie epiese wedren het nie.
“Onthou, ons ouens wat op die plaas grootgeword het, het nie op die teerpad leer fietsry nie. Ons ken van oor slootjies ry en weet wat die wiel gaan doen as jy oor ’n klip ry. Ons verstaan die terrein waar ons moet ry baie goed, en dis ’n groot voordeel,” vertel hy.
