Mev. Gloudien van Rensburg (65) is drie keer in ’n aanval op die Cosmopolite-wildsplaas buite Baltimore geskiet en sal moontlik verlam wees indien sy van haar beserings herstel.
Sy veg tans om haar lewe in die Medi-Clinic Limpopo in Polokwane. Mnr. Johan van Rensburg is langs sy vrou in sy bed doodgeskiet.
Die bebloede egpaar is Woensdag (20 Junie 2012) om 04:00 deur mnr. Francois Moolman, ’n professionele jagter, te hulp gesnel. Moolman bly in ’n ander huis op die erf.
Vier Amerikaanse toeriste wat op die plaas was om daar te jag, is deur die geweerskote wakkergemaak. Die toeriste het glo vier mans by die badkamervenster van die huis sien uitspring.
Die aanvallers het glo ’n gat in die elektriese heining om die plaashuis gesny en diefwering voor ’n badkamervenster oopgebuig. Daar word steeds na hulle gesoek.
Bron: Volksblad
