Ná ’n boervrou van Baltimore vir sowat twee weke lank in ’n hospitaal om haar lewe geveg het, is sy Donderdagnag (5 Julie 2012) oorlede. Die 65-jarige me. Gloudien van Rensburg het ernstige beserings in haar nek en kop opgedoen toe aanvallers haar en haar man, die 77-jarige mnr. Johan van Rensburg, in hul bed geskiet het. Johan is op die toneel dood.
Luidens ’n berig op Beeld.com het Gloudien in die Mediclinic Limpopo in Polokwane gestref. Medici het die egpaar se drie kinders, Hanro, Irmi en Gloudie, na die hospitaal ontbied toe haar toestand versleg het.
Nog een verdagte
Supt. Ronel Otto, woordvoerder vir die Polisie, sê die aanklagte van poging tot moord en moord teen die vier verdagtes in aanhouding, sal nou na twee moordklagte verander word.
Intussen staar mnre. Samuel Machoga, Jonathan Mafifi, Elvis Kobe en Marcus Sithole ook aanklagte van gewapende roof en huisbraak in die gesig.
Otto sê ’n week voor die aanval het die mans glo in die egpaar se huis ingebreek.
’n Groep toeriste van Amerika, wat tydens die aanval op die Van Rensburgs se plaas gejag het, het vier mans van die toneel sien weghardloop kort ná hulle die skote gehoor het.
Reëlings vir Gloudien se begrafnis is nog nie bekend nie. Johan is verlede week ter ruste gelê.
Bron: Beeld
