Die grootste private sitrusprodusent in Suid-Afrika, Die Bosveld Groep in Limpopo, is aangewys as Landbouskrywers SA se Nasionale Boer van die Jaar op ’n geselligheid in Bloemfontein.
Prof. Ferdi Meyer, direkteur van die Buro vir Voedsel- en Landboubeleid, is as Landboukundige van die Jaar aangewys en die Nuwe Toetreder tot Kommersiële Boerdery van die Jaar is mnr. Ralph en me. Preline Swart van Elim in die Wes-Kaap, waar hulle op 1280ha boer, wat hulle van die Morawiese kerk huur. Hulle het vanjaar hul lewenslange ideal bereik om hul eie kommersiële plaas te besit, met die koop van 'n 950 ha plaas naby Stormsvlei, Riviersonderend.
Met die aankondiging van die wenners by Landbouskrywers SA se jaarlikse toekenningsgeleentheid in Bloemfontein het voorsitter Magda du Toit gesê die kompetisie was vanjaar besonder straf aangesien boere en landboukundiges voortdurend die vlakke van uitnemendheid in hul bedryf verhoog.
"Dit is die 37ste agtereenvolgende jaar wat ons hierdie toekennings doen en ons beskou dit as 'n mylpaal in ons geskiedenis. Ons bedank ons ??borge, Santam Landbou en Absa Agribesigheid, vir hul volgehoue ??ondersteuning.”
* Die Bosveld Groep het in die 1960's op 100 ha sitrus in Letsitele begin boer. Vandag is dit 'n groep van maatskappye met meer as 3 600 ha sitrus wat 5,5 miljoen kartonne uitvoervrugte lewer.
Die groep produseer ook 1 750 ton piesangs, 300 ton avos, 550 ton lietsjies, 2 000 ton veselperskes en 60 000 ton suikerriet op die verskillende plase in Letsitele, Hoedspruit, Burgersfort, Politsi, Malelane en Komatipoort.
Die groep is tans in die nuus weens sy betrokkenheid by 'n loodsprojek saam met die Nasionale Beplanningskommissie om 'n model vir grondhervorming te vestig, soos deur die Nasionale Ontwikkelingsplan voorgestel.
* Die Landboukundige van die Jaar, porf. Ferdie Meyer, is bekend in die landbousektor vir sy rol in die totstandkoming van die Buro vir Voedsel- en Landboubeleid, tien jaar gelede. Die buro is 'n voertuig vir scenariobeplanning en risiko-analise - 'n eerste vir Suid-Afrika.
Die buro is ook 'n navorsingseenheid vir die Nasionale Beplanningskommissie en die Nasionale Landboubemarkingsraad van Suid-Afrika. Ander belangrike belanghebbendes is die Departement van Handel en Nywerheid, die Tesourie, die Mielietrust, Graan Suid-Afrika en 'n verskeidenheid van bedryfsorganisasies.
Ses boere, ses landboukundiges en drie nuwe toetreders tot kommersiële boerdery het meegeding om die gesogte titels.
Hierdie jaar se kandidate vir die Boer van die Jaar-titel was mnr. Cobus van Coller van die Vrystaat, die Bosveld Groep van Limpopo, mnr. Alan Sutton van Mpumalanga, mnr. Richard Hobson van Noordwes, mnre. Hennie en Bertie Coetzee van die Hencoe Boerdery in die Noord-Kaap en die Mooigezicht Boerdery in die Wes-Kaap.
Die kandidate vir die Landboukundige van die Jaar was mnr. Charl Hunlun van die Vrystaat, prof. Ferdi Meyer van Gauteng, dr. Schalk Schoeman van Mpumalanga, mnr. IB Oosthuizen van Noordwes, Dirk Günter van die Noord-Kaap en prof. Louw Hoffman van die Wes-Kaap.
Die kandidate vir die Nuwe Toetreder tot Kommersiële Boerdery was mnr. Keith en me. Jacqui Middleton van Jacobsdal in die Vrystaat, mnr. Morapedi Mutloane van Noordwes en mnr. Ralph en me. Preline Swart van die Wes-Kaap.
Die wenners hieronder: Van links is mnr. Francois Smit (Absa), Magda du Toit (nasionale voorsitter Landbouskrywers SA), mnre. Milaan Thalwitzer (Bosveld-groep: Boer van die Jaar), Ralph Swart en sy vrou, Preline (Nuwe Toetreders tot Kommersiële Boerdery), prof. Ferdi Meyer (Landboukundige van die Jaar) en mnr. Gerhard Diedericks, hoof van Santam-landbou. Foto: Johan Norval
