Die verbeterde Harties-broeiery is op 25 Mei amptelik heropen nadat sy vloeroppervlakte verdubbel en sy kapasiteit vir die plasing van bevrugte eiers om uit te broei, met die helfte verhoog is.
“Die bedryf gaan deur goeie en slegte tye. Ons beleef tans waarskynlik een van die slegste tye, maar ons gaan aanhou belê. Dit is nóú die tyd om te belê,” het Hennie Lourens, uitvoerende hoof, by die geleentheid gesê.
Baie hoë voerkoste, beurtkragkoste en ’n onvermoë om dié koste ten volle deur hoër verkoopspryse te verhaal, maak omstandighede moeilik in die pluimveebedryf.
