Brandbestryders van die Kaapse Wynland-distriksmunisipaliteit het vandag teen 12:00 ’n brand in die Witzenbergvallei in die distrik Ceres onder beheer gebring. Die brandbestrydingsdienste is vanoggend na die vallei ontplooi.
Me. Jo-Anne Otto, woordvoerder van die distriksmunisipaliteit, sê vier helikopters – twee van Henley Air en twee van die provinsiale rampbestuursentrum – en vier grondspanne van die rampbestuursentrum het gehelp om die brand onder beheer te bring. Die helikopters het omstreeks 10:45 na hul basisse teruggekeer. Die vier grondspanne sal op die brandlyn bly en voortgaan met moniterings- en opruimingsoperasies.
Mnr. Sakkie Hanekom, ’n boer van die Witzenbergvallei, sê verskeie boere en hul werkers het vanoggend gehelp om die brand te bestry. Die brand kon nie gisteraand onder beheer gebring word nie omdat dit in die ruigtes ingewaai het. Hul plaas, Slagboom, het die ergste onder die brand deurgeloop, maar geen infrastruktuur of landbougewasse is beskadig nie.
Otto sê die brand het in natuurlike bosse naby vrugteboorde gewoed en alle pogings is aangewend om landbougrond te beskerm. Op plase in die omgewing is dit nou pluktyd. “Die baie warm temperature van 30 °C en hoër wat vir die omgewing voorspel word, is ’n rede tot kommer aangesien opvlammings meer waarskynlik in sulke toestande is.”
Me. Elna von Sclicht, burgemeester van die Kaapse Wynland, sê die oorsaak van die brand is nog onbekend, maar die eerste prioriteit was om die brand te blus en sodoende landboubedrywighede te kan beskerm.
Brandseisoen in die Kaapse Wynland
Hoewel die tydperk van 1 November tot 30 April as brandseisoen beskou word, is Februarie en Maart die twee besigste maande. Sedert 1 September 2022 het die brandweer van die distriksmunisipaliteit reeds op 478 brande gereageer. Dit is byna ses brande per dag oor die afgelope 70 dae.
Luidens ’n verklaring van die distriksmunisipaliteit is dit in hierdie stadium moeilik om presiese syfers te gee van hoeveel hulpbronne gebruik is om brande te bestry, maar van 1 November tot 27 Desember is R1,9 miljoen slegs op lughulpbronne bestee en ’n verdere R271 000 op grondspanne. Dit sluit bedryfskoste soos brandstof en die onderhoud van toerusting uit.* Otto het om 16:00 vanmiddag aangedui dat die munisipaliteit se branddienste ook gestuur is om ’n brand tussen die koppies op ’n volstruisplaas buite Touwsrivier te bestry. Die brand is glo deur weerlig veroorsaak en is vanmiddag by die munisipaliteit aangemeld.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
