Volgens me. Jo-Anne Otto, woordvoerder van die munisipaliteit, is die brand baie hoog in die berge en is dit ontoeganklik vir brandbestrydingsvoertuie.
Die provinsiale rampbestuursentrum het ook vanoggend lugsteun ontplooi. Toegeruste 4x4’s is gebruik om grondspanne en hul toerusting so na as moontlik aan die brandlyn te vervoer, maar spanne moes steeds ’n redelike afstand stap voordat hulle die lyn bereik het.
Otto sê die plantegroei in die veld waar die brand ontstaan het, is sowat 15 jaar oud. “Gewoonlik sou die brand net gemonitor word om te verseker dat die inheemse plantegroei – meestal proteas wat ’n brandgedrewe ekologie is – sy natuurlike verloop kan volg.
“Maar daar is verskeie kwessies met betrekking tot die brand se nabyheid aan Eskom-kragdrade, ’n natuurreservaat en landbougrond. Brandspanne sal hulle daarop toespits om die brandlyn weg te draai van die Eskom-drade en dit te probeer dryf in die rigting van Ceres waar dit, weens ’n tekort aan brandbare materiaal, vanself sal uitbrand.”
Sy sê die ongelyke, moeilike terrein gekombineer met die voorspelde warm weer sal moeilik vir die grondspanne wees.
Daar is 42 grondspanlede en die Black Hawk van die provinsiale rampbestuursentrum op die toneel.
Boere slaggereed om te help
Otto vertel grondeienaars en boere is altyd bereid om te help wanneer ’n brand onder beheer gebring moet word, en dit is weer die geval met dié brand. “Die boere help onder meer om waterpunte aan te dui sodat die tenkers volgemaak kan word. Hulle kan ook aandui waar daar damme is waar die lugsteun water kan skep.
“Nog ’n manier hoe boere help, is deur hul bakkies en werknemers in te span om veld wat aan die brandende gedeelte grens, skoon te maak.”
* Die Kaapse Wynland-distriksmunisipaliteit het op 9 Januarie om 16:00 bevestig dat die brand onder beheer gebring is.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
