Duisende hektare kosbare weiding, tesame met talle diere en plaasgeboue, het in die slag gebly tydens 'n hewige brand wat in die omgewing van Cathcart in die Oos-Kaap gewoed het.
Sowat 15 plase en 17000 ha het die naweek binne 18 ure by Cathcart uitgebrand.
“Altesame 41 beeste, 163 skape en drie donkies is tydens die brande dood,” het mnr. Andries Greeff, Agri Oos-Kaap se streekverteenwoordiger, aan Landbou.com gesê.
“ ’n Paar geboue het afgebrand en honderde kilometers van draadheinings het ook in die slag gebly. Boere praat met hul versekeringsmaatskappye, veral oor die draadskade wat 'n aardige bedraggie beloop,” sê hy.
Geen beserings
Volgens mnr. Thinus Botha, brandbeskermingsoffisier van die Oos-Kaapse oorkoepelende brandbeskermingsorganisasie, het die brande vroeg Vrydagoggend begin en is dit teen laat Vrydagaand onder beheer gebring. Klein opflikkerings het nog Saterdag voorgekom maar dit is spoedig onder beheer gebring.
Geen persone het beserings tydens die brand aangemeld nie. Botha sê boere en plaaswerkers het saamgewerk om die brand te beveg. In hierdie stadium is die oorsaak van die brand nog nie bekend nie.
Plaaslike boere het 'n komitee gestig wat voerskenkings sal koördineer. “Die komitee bepaal wat jy kry volgens wat jy verloor het,” aldus Greeff. Skenkings stroom glo in en meeste boere het plek gekry om hulle diere te laat wei tot tyd en wyl voerskenkings ontvang word en heinings herstel kan word.
Moedeloos
Mnr. Chris Purdon, veeboer van Cathcart, sê boere is moedeloos weens die knellende droogte en min beskikbare weiding, maar help mekaar steeds. Hoewel daar baie skenkings is, moet die vervoer betaal word. Hy sê om geld vir voer in te samel is nou ’n prioriteit.
“Die owerhede is besig om die saak te ondersoek en kundiges kyk waar die brande begin het. Maar op die ou end bring dit nie die dooie beeste of die weiding terug nie. Boere is veerkragtig en is almal in dieselfde situasie. Ons help mekaar,” sê hy.
Mnr. Richard Armstrong, skaap- en beesboer van die distrik, het 2800 ha sowel as 44 beeste en 56 ooie met hul lammers verloor. Hy sê dit gaan maar sleg op die oomblik, maar hy moet aangaan want hy het geen ander keuse nie.
“Ons kry baie hulp en ondersteuning van ons medeboere,” sê hy. "Niemand het veel om te gee nie, maar steeds gee mense so veel as wat hulle kan."
Foto's: Verskaf
