“Die gebied (wat beskadig is) beslaan sowat 65 000 ha, maar die finale opname moet nog gedoen word,” het mnr. Anton Bredell, Wes-Kaapse minister van plaaslike regering en omgewingsake, op 31 Oktober 2018 gesê. “Ek vermoed die landbou het nie groot skade gely nie, die brand was meer in die berg en die bosbou-area.”
Boere in die Langkloof het Maandagnag angsvolle ure beleef toe die brand noordwaarts oor die berg versprei het. Stormsterk wind het die brand bo-oor die berg na die plase Schoonberg, Louvain en Ganzekraal laat versprei. Die boere het verbete geveg om huis en haard teen die vlamme te beskerm.
Me. Karen Thomlinson van Schoonberg vertel hulle het gestaan en kyk hoe die wind die vonke oor die berg waai. Die wind het die vlamme Maandagnag tot teen die plaashuis gedruk. “Deur die Here se genade het ons geen mense, diere of strukture verloor nie.”
Volgens mnr. Nico Bester van Louvain moes hulle Maandag hul werkershuise en die plaashuis ontruim. “Ons het ons werkershuise ontruim en sowat 10 gesinne word nou in die gastelokaal op die plaas gehuisves. Dis net vroue en kinders waar jy kyk.”
Volgens mnr. Pieter Campher van Ganzekraal brand die bergveld steeds, maar die vuur is teen ’n pad onder beheer gebring.
Teen Woensdag, ’n week nadat die brand bokant Herold ontstaan het, het ’n brand steeds in die De Vlugt-area naby die plase Bewarea en Klein-Bewarea in die Bo-Keurboomsgebied gewoed. Me. Adri van Rooyen, eienaar van die Plaasmeisie Padstal in die Prins Alfredpas tussen Uniondale en Knysna/Plettenbergbaai, sê die brand het sowat 18 km van die padstal in die rigting van Dieprivier langs die Keurboomsrivier gewoed.
“Verskeie brandspanne probeer om die vuur onder beheer te bring,” het me. Marlize Oosthuizen van Dieprivier gesê. “Ek kan nie lank praat nie, want ek beman die radio’s namens my bestuurder Barry Rae en wil nie die telefoonlyne beset nie.”
Mnr. Henry Meyer van Ruiterbos, tussen die Robinsonpas, Mosselbaai en die boere aan die suidekant van die Outeniquaberge, sê ’n voorlopige opname van skade in daardie gebied het getoon dat miljoene rande se skade aan infrastruktuur in die berg gely is. Hy is Agri Wes-Kaap se verteenwoordiger in die distrik. “Skade aan heinings wat in die brand vernietig is, beloop na raming sowat R5 miljoen, en skade aan watertenks en pypleidings sowat R3 miljoen.”
Volgens Meyer is die gevolge van die skade aan waterinfrastruktur nie onmiddellik sigbaar nie. “Ons gaan die gevolge van die skade aan infrastruktuur eers werklik beleef wanneer die boere nie water vir hul vee of weidings het nie.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
