Tekens van ’n opflikkering in die brandewynbedryf is ook goeie nuus vir die wynbedryf, en hou ook groot geleenthede in vir Distell.
“Distell het stewige bedryfsresultate vir die jaar getoon, veral gegewe die agtergrond van resessionêre druk op plaaslike verbruikers en ’n meer mededingende internasionale landskap,” het mnr. Richard Ruston, besturende direkteur van Distell, gesê.
Die maatskappy, een van die wêreld se grootste brandewynprodusente, se inkomste het met 3,7% gestyg tot R22, 3 miljard. ’n Dividend van R3,79 is verklaar. Hooflynverdienste is af met 3,6% na R1,6 miljard. Op die tuisfront het inkomste met 7,8% en verkoopsvolume met 1,5% geklim.
Die spiritualieë-kategorie het sterk inkomste- en volumegroei getoon, en die wynportefeulje het ook wat beide inkomste en volum betref, beter gevaar.
Durbanville Hills, een van Distell se wynhandelsmerke, het volumegroei van bykans 77% getoon. Dié handelsmerk kon ook, soos Alto, vooruitgang maak in internasionale markte. Die snelgroeiende 4th Street-handelsmerk het sy bullopie in Afrika suid van die Sahara en Suid-Afrika voortgesit.
LEES OOK: Distell wil sy boelie-beeld afskud
Brandewyn sonder brieke
Dit wil voorkom asof die dalende neiging in plaaslike brandewynverbruik vir eers in sy spore gestuit is. Viceroy het dubbelsyfergroei getoon die afgelope jaar. Distell is die sesde grootste brandewynprodusent ter wêreld.
“Die brandewynkategorie bly vir ons geweldig belangrik, beide wat inkomste en wins betref. Dis ook ’n ongelooflike produk vir die wynbedryf, in terme van wat dit bied vir wynboere wat volhoubaarheid en kontantvloei betref. Brandewyn speel ’n rol in die breër wyngemeenskap waarvan ons nie kan vergeet nie.”
Dit verg sowat 5 liter wyn om 1 liter brandewyn te produseer.
Ruston sê die maatskappy het ná baie debatte besluit om die afgelope drie jaar nie die prys van Viceroy se vyfjaaroue brandewyn te verhoog nie. Dit was deel van hul strategie om die brandewynkategorie te laat herleef.
“Ons het besef ons moet verbruikers teruglok na die brandewynkategorie. Viceroy is ’n sterk hoofstroom-handelsmerk. Dis nie streeksgebonde nie, maar regoor die land gewild, daarom het ons besluit dis die handelsmerk wat sal moet help om nuwe, swart stedelike verbruikers te lok.”
Volgens hom het dit beteken Distell moes wins op die altaar lê.
“Die groei was egter ongelooflik sterk en die momentum in daardie deel van die mark is baie belangrik vir brandewyn.”
Totale volume in die maatskappy se brandewynkategorie het met sowat 5% toegeneem het. Richelieu en Klipdrift se volumes het stabiel gebly.
“Ons dink ons sien die begin van ’n herlewing, want ten spyte van die taai ekonomie is die totale volume op.”
Volgens Ruston moet hulle nou dié momentum gebruik om verbruikers ook na meer premie-handelsmerke (soos Klipdrift) te trek.
“Ons wil sien dat verbruikers, oor ’n breë deursnit van die mark, na meer premie-brandwynhandelsmerke beweeg.”
