Skokkend hoë brandstofpryse word in April verwag, met ekonome wat voorspel petrol- en dieselpryse kan met tot 60c per liter styg.
Mnr. Dawie Roodt, senior ekonoom by die Efficient-groep, sê met die olieprysstygings en die verskeie belastings wat volgende maand inskop, kan petrol in Gauteng R11, 85 per liter haal.
Die styging in die petrolprys lyk tans as volg: Die brandstofheffing styg met 20c per liter. Die heffing vir die Padongelukkefonds styg met 8c per liter, en in Gauteng styg die heffing vir pyplyne met 4c per liter.
By dié stygings kom ‘n styging van 38c in die pertrolprys weens die styging van die internasionale olieprys.
Die styging van die petrolprys word tot dusver wel deur ‘n sterk rand/dollar-wisselkoers teengewerk, wat daar ‘n daling van 8c veroorsaak. Die som vir die petrolprys styging staan tans dus op 62c per liter.
Dieselprys
Roodt sê hy verwag dat die dieselprys ook met sowat 30c per liter sal styg. Volgens mnr. Dawie Maree, ekonoom vir Agri SA, is dieselfde belastings vir die dieselprys geldig, wat beteken dat ‘n styging van 62c per liter ook vir diesel moontlik is.
Maree sê terwyl dié prys styg, styg die dieselrabat wat aan boere terugbetaal word ook in April - tot R1,58 per liter.
Volgens Maree gaan dit vir boere moeilik wees om nóg ‘n verhoging in dieselpryse en derhalwe insetkoste te hanteer. Dit kan veral problematies wees vir boere wat tans onder droogte deurloop.
“Ten spyte van die rabat, sal so ‘n verhoging in die prys boere hard slaan. Ons kry tans baie klagtes van boere oor droogtes, en dit gaan vir hulle taai wees om dié koste te absorbeer,” verduidelik Maree.
22 Maart 2012
