Die Brasiliaanse vereniging van diereproteïenprodusente (ABPA) is ontevrede daaroor dat die indruk gewek word dat hulle hoendervleis in Suid-Afrika stort.
Die ABPA sê Brasilië voer na meer as 140 lande uit. “Suid-Afrika is die enigste land wat dié narratief teen Brasilië skep,” sê mnr. Luis Rua, ’n ABPA-verteenwoordiger.
“Ons meen dit is baie onregverdig. Ons weet ons stort nie ons hoendervleis in Suid-Afrika nie,” sê hy in ’n verklaring wat in Suid-Afrika versprei is deur ChickenFacts, wat deel is van die vereniging van vleisinvoerders en -uitvoerders (Amie). ChickenFacts sê hy het onderhoude met Brasiliaanse pluimveeprodusente gevoer om ander sienings te kan bied.
“In 2011 (met ’n vorige stortingsondersoek) het ons bewys dat ons nie ons hoendervleis stort nie. Ons hoop dat ons die geleentheid sal hê om dit weer te bewys,” sê Rua. “Ons weet dat Suid-Afrika nie genoeg hoendervleis kan verskaf om in die vraag te voorsien nie. Ons wil graag bewys ons doen niks verkeerd nie.”
Die verklaring kom nadat die Suid-Afrikaanse Pluimveevereniging (SAPV) verlede jaar by die kommissie vir internasionale handelsadministrasie (Itac) aansoek gedoen het om teenstortingstariewe op sekere hoendersnitte uit Brasilië, Ierland, Spanje, Pole en Denemarke.
Itac het in Desember die ongewone stap gedoen om voorlopige teenstortingstariewe in te stel, wat tot Junie geld en wat tariewe van tot 265% op sekere snitte uit Brasilië insluit.
ChickenFacts sê ABPA is ontevrede oor die opvatting dat Brasiliaanse pluimveeprodusente roofsugtige handelsvennote is wat hul hoendervleis teen kunsmatig lae pryse aan Suid-Afrikaanse verbruikers wil verkoop, teen laer pryse as plaaslike produsente s’n en wat só plaaslike produsente se volhoubaarheid onder druk plaas.
“Meer as twee derdes van ons uitvoer na Suid-Afrika is byvoorbeeld meganies ontbeende vleis, wat deur fabrieke gekoop word om produkte soos polonie en wors te maak. Suid-Afrika produseer nie sy eie meganies ontbeende vleis nie: Hy moet dit van ons kry.”
Rua sê plaaslike produsente kan met sommige soorte hoendervleis nie in die vraag voorsien nie. “Ons is bly ons kan daardie gaping vul. Dit ontstel ons dat ons van storting beskuldig word en ons werk met al die owerhede saam om te bewys dat ons nie stort nie.
“Brasilië het deur beplanning produkte van deurlopend hoë gehalte, oorvloedige natuurlik hulpbronne en deurslaggewende samewerking tussen sektore daarin geslaag om ’n uitvoerreus te word.”
Rua sê daar is geen voëlgriep in Brasilië nie. “Ons is dalk gelukkig dat ons nie die wildevoëlbevolkings het wat die virus dra nie, maar ons werk ook baie hard om dit te monitor en seker te maak dit sluip nooit in nie.”
Brasilië het volgens ChickenFacts in 2021 sowat 4,6 miljoen ton pluimveeprodukte uitgevoer, nagenoeg 32% van sy totale produksie. Die land was 12 jaar lank die top-hoendervleisuitvoerder en die vraag na sy produkte sal na verwagting vanjaar verder groei.
Die handelsontwrigting wat die Russiese inval in Oekraïne veroorsaak het, beteken dat laasgenoemde se uitvoer na die Europese Unie en Saoedi-Arabië afneem. Brasilië sal na verwagting dié gaping vul.
