Luidens ’n artikel in The Conversation is vier uit tien Britse boere ouer as 65, terwyl die gemiddelde ouderdom 59 is. Die regering bied nou aan ouer boere ’n eenmalige uitbetaling van tot £100 000, oftewel R1,96 miljoen, mits hulle hul grond verkoop, dit verhuur, weggee of bome daarop plant.
Indien meer grond só beskikbaar raak, kan nuwe, jonger en dalk meer entrepreneurgerigte boere gelok word. Ander mense kan ook voordeel trek uit die geleentheid om nuwe grond te koop, insluitend aanliggende boere wat wil uitbrei, of beleggers wat hul portefeuljes wil diversifiseer.
Peter Gittins, skrywer van die artikel, sê sy 69-jarige pa besit ’n plaas van 250 akker (101 ha) in die weste van Yorkshire. Die regering se “goue handskud” is ’n warm besprekingsonderwerp daar, maar sy pa oorweeg dit nie.
