‘n Broederlike bond tussen boer en plaaswerker moet gesmee word om beter veiligheid te verseker, asook beter samewerking om die landbou te laat groei.
Hierdie boodskap het mnr. Senzeni Zokwana, Minister van Landbou, Bosbou en Visserye, oorgedra toe hy en ander belanghebbendes van die Regering terugvoering aan plaaswerkers in De Doorns gegee het oor hulle vordering om dié werkers se lewens te verbeter.
Dít is die Regering se terugvoering nadat hy sekere beloftes aan plaaswerkers gemaak het om hulle lewensomstandighede te verbeter, nadat die werkers in 2012 onwettig betoog het oor onder meer hoër lone.
“Ons moet 'n manier vind om 'n broederlike bond tussen boere en plaaswerkers te skep . . . as jy menswaardigheid aan jou broer (plaaswerker) betoon, sal jy (boer) veilig wees en 'n proses bewerkstellig waar jou besigheid meer sal produseer. Maar as jy hulle sleg behandel, sal hulle net werk wanneer hulle jou sien.”
Zokwana het ook benadruk dat baie boere hul werkers goed behandel.
Ná die staking het plaaswerkers die Regering gevra om aandag aan te skenk aan uitermatige armoede, slegte werksomstandighede, werksuitbuiting en uitsettings.
Verlede jaar het die gemeenskap 'n daghospitaal geëis, nadat die krediet-doktersbrief aan plaaswerkers afgeskaf is.
Zokwana het gesê daar word met die leiers van die plaaswerkers gepraat om dié proses te versnel.
Talle van die plaaswerkers was nie tevrede met die terugvoering nie. Me. Lena Weyers, 'n plaaswerker, het gesê meer moet gedoen word om werkskepping in die gebied tot stand te bring.
“Die skole gee nie meer naaldwerk nie. Hier is ou mense wat die opleiding kan gee. Hier is nie eens ‘n bakkery op De Doorns nie.”
Mnr. Gugile Nkwinti, Minister van Landelike Ontwikkeling en Grondhervorming, het gesê daar word voortgegaan om huishoudelike profiele op te stel van die werkers in die gebied om hulle behoeftes te bepaal. Van die jong mense sal byvoorbeeld opgelei word hoe om huise te bou, het hy gesê.
