Gisteraand by die Agri's Got Talent-grand finale wat op Goudini buite Worcester gehou is, het sy dit uiteindelik reggekry en die negende wenner van dié unieke sangkompetisie geword.
Agri's Got Talent vier landbou as 'n sektor sowel as landbouwerkers wat sterk gebly het gedurende die covid-19-uitdagings.
Bones, wat verantwoordelik is vir die boordargitektuur en snoei by Dennekruin, se stem het die saal se dak spreekwoordelik gelig met haar weergawes van die liedere River deep mountain high en It's all coming back to me now.
Sy sê haar liefde vir musiek kom vanaf haar ouma wat haar gereeld as dogtertjie opgetel het en gesing het terwyl hulle saam op die plaas rondloop.
"My hele familie is mal oor musiek, ons is ’n familie van musikante en sangers," vertel sy.
Bones sê alle musiek raak haar siel aan en hoewel sy van ballades hou, behoort haar hart aan gospel.
Raymond Swartz van Haygrove Growing Systems op Grabouw het die tweede plek verower.
Die derde plek het na Gerthroline Philander van Duo Fruit in Worcester gegaan.
Beide Swartz en Philander het ’n geskiedenis met Agri's Got Talent: Verlede jaar se wenner, Faith Nogemane, is Swartz se suster en Philander se suster, Magdaleen, was in 2019 die AGT-naaswenner.
Agri Wes-Kaap het die prysgelde vir die top 3 geborg.
Drovigas Goshai van Marlenique Pakhuis in Simondium het die Afrikaanse Taalraad se spesiale toekenning vir die beste sanger in ’n inheemse taal gewen. Hy het die skare in die gange laat dans met sy vertolking van die lied Lemoene.
Gisteraand se extravaganza was die eerste lewendige konsert sedert 2019.
Die 2020- en 2021-eindrondes was op digitale platforms uitgesaai weens die pandemie.
"Oor die afgelope twee jaar het die Suid-Afrikaanse landboubedryf veerkragtig gebly in ’n tyd van diepe onsekerheid," vertel die projekbestuurder, Thea van Zyl.
"Agri's Got Talent is nie net 'n sangkompetisie nie, maar ook 'n maatskaplike ontwikkelingsprogram vir landbouwerkers."
Die program is ’n gesamentlike onderneming tussen Hortgro, die sitrusprodusentevereniging, Vinpro, SATI (Suid-Afrikaanse Tafeldruifbedryf) en die Wes-Kaapse departement van landbou.
Die finaliste het almal stem-, verhoog- en media-opleiding ontvang. Hulle het ook ’n sessie met ’n voorkomskonsultant bygewoon wat nuwe klere en selfversorgingspakkette vir hulle aangebied het.
Daarbenewens het Procare ’n reeks selfontwikkelingswerkswinkels gehou om die finaliste se selfvertroue te ontwikkel, hulle te leer om beter te kommunikeer en konflik te hanteer, asook hoe om geld te bestuur.
"Hierdie vaardighede is nie net van waarde vir dié wat potensiële musiekloopbane oorweeg nie, maar ook in die werksomgewing," sê van Zyl.
- Vir meer inligting besoek www.argrisgottalent.com of besoek Agri’s Got Talent se Facebookblad by www.facebook.com/agrisgottalent.com of kontak Thea van Zyl by info@agrisgottalent.com of 083 642 5342.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
