Daar was ’n komiese oomblik, ’n lag en ’n traan tydens die sprokies-troue van mnr. Ghini Greyling, ’n boer van Wakkerstroom, en dr. Milou Diederin, ’n Nederlandse dokter, die afgelope naweek op ’n wildplaas buite Wakkerstroom.
Kort voor die begin van die huwelikseremonie het Greyling se Alsatian-hond Luna, met ’n koevert met Milou se trouring om haar nek, soek geraak. Sy is na ’n lang gesoek opgespoor waar sy by een van die gaste se voete aan die slaap geraak het.
Die troue kon toe begin en Luna en Greyling se ander getroue hond, Bhubezi, wat soos Luna altyd aan hul baas se sy is, het nader gedraf toe Greyling hulle met ’n fluit roep toe die oomblik aanbreek dat hy die ring aan Milou se vinger moes steek.
