Tot 150 buffels gaan in die Nasionale Kruger-wildtuin van kant gemaak weens die voorkoms van beestuberkulose in die wildtuin.
Dié buffels word van kant gemaak as deel van ’n navorsingsprojek oor beestuberkulose in die wildtuin.
Die projek is vier jaar gelede begin toe radio-halsbande gebruik is om 200 buffels in die wildtuin vir dié hoogs aansteeklike siekte te monitor. Daar sal nou nadoodse ondersoeke verrig word op die diere wat van kant gemaak gaan word.
Beestuberkulose het in die 1950’s vastrapplek in die Kruger-wildtuin gekry toe van die wildtuin se buffels in kontak gekom het met beeste wat met die siekte besmet was.
Intussen het die siekte versprei na 12 ander diersoorte in die wildtuin, insluitend leeus, jagluiperds, koedoes, rooibokke en bobbejane.
Bron: Volksblad
